Ambliopia — "Syri Dembel"

Ambliopia ("syri dembel") është një gjendje ku shikimi në njërin sy nuk zhvillohet normalisht gjatë fëmijërisë, edhe pse vetë syri mund të duket i shëndetshëm.

Kur duhet të shihen fëmijët nga mjeku?

Akademia Amerikane e Oftalmologëve rekomandon depistimin në këto periudha:

• Që nga lindja deri në 3 muaj
• 6 muaj – 1 vit
• 3 vjeç
• 5 vjeç

Periudha më e mirë për diagnostikim dhe mjekim është sa më shpejt që të shfaqen shenjat e para, dhe gjithsesi para përfundimit të periudhës kritike (5–7 vjeç), pasi mundësia për mjekim efektiv mbaron pas kësaj moshe. Diagnostikimi i hershëm sjell gjithashtu rehabilitim më të shpejtë.

Çfarë dëmtohet nga ambliopia?

• Shikimi binokular (stereoskopik) dhe mundësia për të dalluar thellësinë
• Vështirësi për të dalluar lëvizjet e objekteve
• Kontrasti mes ngjyrave
• Orientimi

Si mjekohet ambliopia?

Kryesorja është eliminimi i shkakut që ka sjellë formimin e ambliopisë. Mënyrat kryesore të mjekimit janë: okluzioni, penalizimi, dhe stimulimi me aparate stimuluese.

Fëmija mund të mbajë syrin mbyllur jo më shumë se një javë për çdo vit jete — megjithatë kjo përzgjidhet individualisht nga mjeku.

Teksti u redaktua nga Dr. Edmond Isufaj dhe Dr. Besa Isufaj.

Teksti ka karakter informativ dhe jo mjekësor. Për vlerësim të personalizuar, konsultohuni me mjekun tuaj.